কেতিয়াবা এটা সৰু চিন্তাইও এদিন সুন্দৰ ৰূপ লয়। আজি জ্ঞান-আৰোগ্যম শাখা সাহিত্য সভাৰ প্ৰথমখন আনুষ্ঠানিক সভা অনুষ্ঠিত হোৱাত মোৰ মনটো আনন্দেৰে ভৰি পৰিছে। প্ৰণামিকা শৰ্মা বাইদেউৰ সৈতে মোৰ প্ৰথম চিনাকি হৈছিল আমাৰ জাতীয় কবি, প্ৰয়াত আনিছ উজ জামান ডাঙৰীয়াই আমন্ত্ৰণ জনোৱা এটা অনুষ্ঠানত। সেই অনুষ্ঠানটোৰ ঘোষিকা আছিল প্ৰণামিকা বাইদেউ। গুৱাহাটীৰ অসম সাহিত্য সভাৰ কাৰ্যালয়ৰ লক্ষ্মীৰাম বৰুৱা সদনত অনুষ্ঠিত সেই অনুষ্ঠানৰ পিছত প্ৰধান সম্পাদক দেৱজিত বৰাদেৱৰ চেম্বাৰত বাইদেউৰ সৈতে কথা পতাৰ সুযোগ পাইছিলোঁ। পৰৱৰ্তী সময়ত ২০২৬ চনৰ ৩ ফেব্ৰুৱাৰীত শ্ৰীমন্ত শংকৰদেৱ কলাক্ষেত্ৰত অনুষ্ঠিত অসম সাহিত্য সভাৰ মধ্যকালীন অধিৱেশনত তেখেতক ঘোষিকা হিচাপে আমন্ত্ৰণ জনাইছিলোঁ। ইয়াৰ পিছতো কেইবাটাও অনুষ্ঠানত একেলগে কাম কৰাৰ সুযোগ পাইছোঁ। বিশেষকৈ ২ জুলাইত অসম সাহিত্য সভাই আয়োজন কৰা চিকিৎসক দিৱসৰ অনুষ্ঠানৰ শেষত মই বাইদেউক এখন নতুন শাখা সাহিত্য সভা গঠনৰ অনুৰোধ জনাইছিলোঁ। মোৰ ইচ্ছা আছিল শিক্ষক আৰু চিকিৎসকসকলক সাহিত্য চৰ্চাৰ বাবে এখন উমৈহতীয়া মঞ্চ দিয়া। বাইদেৱে মোৰ কথাটো গুৰুত্বসহকাৰে লৈ আগবাঢ়ি অহাত মই যথেষ্ট সুখী হৈছিলোঁ।
‘জ্ঞান-আৰোগ্যম’ নামটোৱে মোৰ মন জয় কৰিছে। ‘জ্ঞান’ মানে শিক্ষক-শিক্ষয়িত্ৰীসকলৰ জ্ঞান আৰু ‘আৰোগ্যম’ মানে চিকিৎসকসকলৰ সেৱা আৰু স্বাস্থ্যৰ কথা। প্ৰণামিকা শৰ্মা বাইদেউ নিজেও এগৰাকী শিক্ষয়িত্ৰী। কেইবছৰমান আগতে তেখেতৰ কিডনী সংৰোপণ কৰিবলগীয়া হৈছিল। সেইবাবে আজিও নিয়মীয়াকৈ ঔষধ খাবলগীয়া হয়। কিন্তু শাৰীৰিক অসুবিধা থকাৰ পিছতো তেখেতে যিধৰণে সমাজৰ কামত নিজকে ব্যস্ত ৰাখিছে, সেয়া সঁচাকৈয়ে প্ৰশংসনীয়। কামৰ ক্ষেত্ৰত বহু সুস্থ-সবল মানুহেও তেখেতক পিছ পেলাব নোৱাৰিব। তেখেতৰ এই কৰ্মস্পৃহা আৰু মনৰ শক্তি সঁচাকৈয়ে প্ৰেৰণাদায়ক।
আজি ৭ নৱেম্বৰ, ২০২৬ তাৰিখে গুৱাহাটী চিকিৎসা মহাবিদ্যালয়ৰ চি. এন. চেণ্টাৰৰ প্ৰথম মহলাত জ্ঞান-আৰোগ্যম শাখা সাহিত্য সভাৰ প্ৰথমখন আনুষ্ঠানিক সভা আৰু সম্বৰ্ধনা অনুষ্ঠান অনুষ্ঠিত হয়। অনুষ্ঠানত মুখ্য অতিথি হিচাপে উপস্থিত আছিল অসম সাহিত্য সভাৰ প্ৰাক্তন সভাপতি তথা আই পি এছ বিষয়া কুলধৰ শইকীয়া ডাঙৰীয়া। তেখেতৰ সহজ-সৰল ভাষাত দিয়া ভাষণ মোৰ বৰ ভাল লাগিল। বিশেষকৈ প্ৰণামিকা বাইদেউৰ ৭৯ বছৰীয়া পিতৃ শ্ৰী পৰেশ কুমাৰ শৰ্মাদেৱে নিজে গাড়ী চলাই যোৰহাটৰ পৰা গুৱাহাটীলৈ অহাৰ কথাটোৱে মোক বিশেষভাৱে আকৰ্ষিত কৰিলে। এই বয়সতো তেখেতৰ উৎসাহ আৰু কৰ্মস্পৃহা সঁচাকৈয়ে প্ৰশংসনীয়। অনুষ্ঠানত লগতে উপস্থিত আছিল অসম সাহিত্য সভাৰ প্ৰধান সম্পাদক দেৱজিত বৰাদেৱ, গুৱাহাটী চিকিৎসা মহাবিদ্যালয়ৰ অধ্যক্ষ অধ্যাপক ডাঃ বাবুল কুমাৰ বেজবৰুৱা আৰু বহুকেইগৰাকী গণ্য-মান্য ব্যক্তি। শাখাৰ সভাপতি ডাঃ ৰুবী কটকী আৰু সম্পাদক প্ৰণামিকা শৰ্মা বাইদেউৰ স্বাক্ষৰিত আমন্ত্ৰণ-পত্ৰ লাভ কৰি মই আনন্দিত হৈছিলোঁ।
অনুষ্ঠানত সকলোৰে আগত মোক সন্মান জনাই চিনাকি কৰাই দিয়াৰ বাবে আন্তৰিক ধন্যবাদ জনাইছোঁ। বিশেষকৈ বাইদেৱে মোক মঞ্চলৈ মাতি নি ২ জুলাইৰ সেই অনুৰোধৰ কথা উল্লেখ কৰি, মোৰ অনুৰোধৰ পৰাই এই শাখাটো গঠনৰ চিন্তা আৰম্ভ হোৱা বুলি সকলোৰে আগত কোৱাত মই যথেষ্ট আৱেগিক হৈ পৰিছিলোঁ। আজিকালি বহুতে আনৰ অৱদান স্বীকাৰ কৰিবলৈ নিবিচাৰে। কিন্তু বাইদেৱে সকলোৰে আগত কথাটো অকপটে কোৱাটো মোৰ বাবে বহুত ডাঙৰ প্ৰাপ্তি। মানুহৰ প্ৰকৃত ডাঙৰ পৰিচয় আনৰ অৱদানক সন্মান জনোৱাৰ মাজতো প্ৰকাশ পায়। বাইদেউৰ এই আন্তৰিকতা আৰু উদাৰ মনৰ বাবে বিশেষ ধন্যবাদ জনালোঁ। ২ জুলাইৰ এটা সৰু অনুৰোধৰ পৰা ৭ নৱেম্বৰত এখন নতুন শাখা সাহিত্য সভাৰ প্ৰথম সভা অনুষ্ঠিত হোৱালৈকে এই যাত্ৰা মোৰ বাবে সদায় স্মৰণীয় হৈ থাকিব।